Tuesday, February 19, 2008

ပြည်တွင်းဖြစ် ကိုလိုနီ

ကျနော်တို့ အသက် ၄၀ တန်း ၅၀ တန်း ၀န်းကျင်ရှိနေတဲ့ လူတွေ (၀ါ) ပြည်သူအများစုဟာ သူတို့ တချိန်လုံး ပြောပြောနေတဲ့ အင်္ဂလိပ်ခေတ်၊ ဂျပန့်ခေတ်၊ နယ်ချဲ့ကိုလိုနီ၊ ယ္ခုခေတ်သစ်မှာ ဖြစ်ပွားနေတဲ့ စစ်ပွဲတွေဟာ ကိုလိုနီ လက်သစ်ဝါဒ ပရိယာယ် စသည်ဖြင့်ပေါ့ဗျာ .. အဲ့ဒါတွေ တကယ့်လက်တွေ့မျက်တွေ့ မဟုတ်ခဲ့ပါဘူး။ ကြားနာ မှတ်သားရတာတွေချည်းပါ။

တကယ့်မျက်ဝါးထင်မြင်ခဲ့ကြားခဲ့၊ လက်တွေ့ခံစားမှုကတော့ စစ်အုပ်ချုပ်မှု့ ၂၆နှစ်နဲ့ အနှစ် ၂၀ (၂၀၀၈အထိ) မြင်ကွင်းတွေပါ။ နှစ်ခုပေါင်း ၄၆နှစ်အတွက် ဘယ်သူ့ပြည်သူ့အာဏာမှ မဟုတ်ဘဲ စစ်အာဏာရှင် အစဉ်အဆက် အုပ်ချုပ်ပြီး ကိုယ့်အုပ်ချုပ်မှု့ တဖက်စောင်းနင်းကျမှု့ကြောင့် တိုင်းပြည် ဆင်းရဲမွဲတေ(ပြာကျ) ခဲ့တာ မျက်မြင်ကိုယ်တွေ့ပါ။


ဒေသအသီးသီးက အရင်းအမြစ်မှန်သမျှ စစ်အာဏာရှင်တွေ အဓိက အခြေပြုဒေသ အတွက်သာ ဦးစားပေးဦးတည်လုပ်ခဲ့တာကြောင့် တိုင်းပြည်နွံနစ်တာလေ၊ ဥပမာဘဲကြည့် .. ကယားတို့ဒေသ လွိုက်ကော်က လောပိတရေအားလျှပ်စစ်ထွက်သမျှ လွိုက်ကော်ကို အမှောင်ထုထဲထားပြီး ရန်ကုန်ဒေသအတွက် အဓိကသုံးခဲ့သလို၊ ယ္ခု နေပြည်တော်ဒေသအတွက် ဖြစ်သွားပြန်ပြီလေ။ မိုးကုတ်ဒေသက ထွက်တဲ့ ကျောက် မိုးကုတ်ဒေသအတွက် ဘာဖြစ်ခဲ့ပါသလဲ။ ရခိုင်၊ မုတ္တမက ထွက်တဲ့ ရေနံဓာတ်ငွေ့ အဲ့ဒီဒေသမှာ ဘာတွေ သုံးခဲ့ပါသလဲ။ ဧရာဝတီက လယ်သမား ဘာကြောင့် ဆန်ကွဲနဲ့ နှစ်ပါးသွားနေရသလဲ။

ကရင်ပြည်နယ်၊ ကချင်ပြည်နယ်၊ ချင်းတောင်တန်းကထွက်တဲ့ သစ်အကျိုးအမြတ်တွေ အဲဒီ့ ဒေသအတွက် ဘာများတောက်ပြောင်စေခဲ့ပါသလဲ။ တကယ်တော့ မြန်မာပြည် ဘယ်အရပ်က ဘာထွက်ထွက် တိုင်းတပြည် ဘက်ပေါင်းစုံ တိုးတက်မှုအစား စစ်အာဏာကို အထောက်အပံ့ဖြစ်စေမယ့် အရာတွေ အတွက်သာ လုပ်ခဲ့တာချည်းပါ။ ရုရှားကို နူကလီယား ပညာသင်လွှတ်ပါသတဲ့ အရပ်သား ပညာတော်သင် ထက်မြက်သူ တစ်ယောက်မှ မပါဘူး။ စစ်တပ်ကချည်းဘဲလေ။ ဘာကုမ္ပဏီ ညာကုမ္ပဏီ ဘာတူးဖော်ရေး ညာတူးဖော်ရေး တပ်မိသားစုနဲ့ တပ်မိသားစု ဆက်နွယ်သူချည်းပါဘဲ။ ပြင်ပပြည်သူအများစုအတွက်တော့ မဖြစ်စလောက် မြေကွက်ကလေး၊ ဟမ်းဖုန်းလေး၊ ပါမစ်အသစ်စားလေးနဲ့ ချွေးသိပ်၊ ညာခိုင်း၊ ခြောက်ခိုင်း ခဲ့တာချည်းပါဘဲ မဟုတ်လားခင်ဗျာ ..
ဘာသာရေးကအစ အဖက်ဖက်က စစ်အာဏာရှင်ကို ကျားကန်ပေးတဲ့ ဒေါက်တွေချည်းဘဲ ဖန်တီးခဲ့တာလေ။

ခုဘဲကြည့်လေ .. နေပြည်တော် (စစ်အာဏာရှင်ရဲ့ဒေသ) စည်ပင်ဖို့ ရန်ကုန်က တိရိစ္ဆာန်ဥယျာဉ်က သတ္တ၀ါလေးတွေ ဟိုကိုရွှေ့တယ်လေ။ မသကာ တခြားက ရှာထည့်ပေါ့။ နောက် ရန်ကုန်မြို့တော်ဝန်ရဲ့ ညီမဈေးဝယ်ထွက်တာ ဈေးသည်နဲ့စကားများလို့ မနက်-၆နာရီ ကနေ ညနေ၆-နာရီ လမ်းဘေးဈေးဆိုင်မထွက်ရဆိုဘဲ ... ဒီလုပ်ငန်းနဲ့ အသက်မွေးဝမ်းကျောင်းသူတွေ ဘာနဲ့ထ္မင်းသွားစားမလဲ ။ အဲ့ဒါကိုက ပြဿနာလေးတစ်ခုရဲ့ အစပေါ့။ အဲ့ဒါ အသေးအဖွားလေးဘဲရှိသေးတယ်။

အဲ့ဒီ ကိုယ့်ရဲ့ တဖက်စောင်းနင်းကျမှု့တွေကို အသိဝင်လာတဲ့ တတ်၊သိ ပညာရှင်တွေက တစတစကို နည်းမျိုးစုံနဲ့ တွန်းလှန်လာကြတာ ဘယ်ပြည်ပ ပယောဂကမှ သွေးထိုးစရာ မလိုပါဘူး။ အဲ့ဒီတော့ စစ်အာဏာရှင်ရဲ့ အမူအကျင့်တွေ မပြောင်းလဲသ၍ နောက်ထပ် နောက်ထပ် နှစ်ဘယ်လောက် ကြာကြာ ၁၀စုနှစ်လား ရာစုနှစ်ကြာပါစေ တွန်းလှန်မှုက ဆက်ရှိနေမှာပါ။ ၈၈ ကျောင်းသား အရေးအခင်း တော်လှန်ရေးဟာ ဘယ်ပြည်ပ ပယောဂမှ မဟုတ်ပါဘူး။ ဖိလွန်းလို့ ကန်တက်လာတဲ့ စပလိမ် အာဏာကြောင့်ပေါ့။ အဲ့ဒီ အချိန်တုန်းက ဦးဆောင် ဘယ်နိုင်ငံရေး အစဉ်အလာ လူကြီးတွေက အုံကြွကြပါစေလို့ လမ်းညွှန်ခံရတာ မဟုတ်။ အန်တီစုတောင် ကိုယ်ရေးကိုယ်တာနဲ့ ရောက်ခိုက် ထဲထဲဝင်ဝင် ဖြစ်လာခဲ့တာ (ဂရုဏာရှိလွန်းလို့ပါ။)

၂၀၀၇ သံဃာတော်တွေရဲ့ ရွှေဝါရောင် ကိစ္စကကော အဲ့ဒီကာလ မတိုင်ခင်မှာ ကိုမင်းကိုနိုင်ကြီး အပါအ၀င် အဖွဲ့လိုက်ကြီး အထဲမှာ ခေါ်စိထားတာ၊ အန်တီစုကြီးးကိုလဲ သူတို့ ချုပ်ထားတာတို့ဟာ လက်နက်မဲ့ပြည်သူတရပ်လုံးကို ဘယ်ကောင်မှ ခွေးမထင်ဘူးဆိုတဲ့ အချိုးနဲ့ ရဟန်းတော်တွေကို စစ်တွေတို့ ပခုက္ကူတို့မှာ လက်လွန် ခြေလွန် လုပ်ခဲ့၊ ထပြီး ပွဲကြမ်းကြတာလေ။ ဘယ်မှာလဲ ပြည်ပတပ်တွေ၊ အကြံပေး မျက်နှာဖြူတွေ? ဖိလွန်းလို့ ကြွတာမဟုတ်လား .. အတပ်ဟောကိန်းထုတ်လိုက်ပါအုန်းမယ်။ ဒီစစ်အုပ်ချုပ်မှု့ ပုံစံမျိုးနဲ့ ဒါမှ မဟုတ် စစ်တပ်ကို ကျော်ထောက်နောက်ခံပြုမဲ့ အုပ်ချုပ်ရေးစနစ်မျိုးနဲ့ နောက်ဘုရားတွေ ဘယ်လောက်ပွင့်ပွင့် ဘယ်တော့မှ ငြိမ်းချမ်း သာယာဖွံ့ဖြိုးမှု့ ဖြစ်လာမှာ မဟုတ်ပါဘူး။ မကျေနပ်မှု့ ယမ်းမှုန့်လေး တမှုန့် နှစ်မှုန့်ကနေ အမြဲတမ်း အချိန်တချိန်ရောက်ရင် ပေါက်ကွဲမှုကတော့ မလွဲမသေ ဖြစ်အုန်းမှာပါ။

နိဂုံးချုပ်ရရင် .. သူတို့ပြောတဲ့ ခေတ်သစ်ပြည်ပနယ်ချဲ့ကိုလိုနီထက် ခေတ်အဆက်ဆက်ပြည်တွင်းက ကိုလိုနီတွေက အနီးကပ်ဖျက်ဆီးရေးသမားတွေဆိုတာ ထင်ရှား ပါတယ်ခင်ဗျား။ ဒါကြောင့် နှလုံးရည်၊ လက်ရုံးရည်နဲ့ နိုင်တဲ့ အခြေအနေကနေ ဆက်လက်ဆန့်ကျင်မှု့တွေ ဖြစ်နေအုန်းမှာပါ။ တစ်ခုတော့ စစ်ကိုလိုနီပြည်တွင်းဖြစ်တွေကို သတိပေးလိုက်ချင်ပါရဲ့ .. ခေတ်တွေ ပြောင်းနေပြီ၊ ရုပ်ပိုင်းဆိုင်ရာနာမ်ပိုင်းဆိုင်ရာတွေဟာ မျိုးဆက်သစ်တွေက လျှင်လျှင်မြန်မြန် သိတတ်လာကြပြီ။ လက်ရှိပုံစံမျိုး အုပ်ချုပ်မှု့မျိုးနဲ့ ကြာကြာဆက်မထိန်းနိုင်တော့မှာ သေချာတယ်။ ဥပမာပြောရရင် ရုပ်ပိုင်းတွန်းလှန်မှု့သမားတွေ လက်ထဲ စတင်းဂန်း ဒုံးကျည်လိုမျိုးတွေ နောင်မပိုင်ဆိုင်နိုင်ဘူးလို့ ပြောလို့မရတဲ့ ခေတ်ထဲရောက်ခဲ့ပြီဆိုတာ သတိရစေချင်တယ်။ အချိန်မီ မျှမျှတတ တတိုင်းပြည်လုံး မှန်မှန်ကန်ကန် အကျိုးတူစီးပွားဖက်မျိုး ညှိုနှိုင်းချီတတ်မှ ဘေးတိုင်းပြည်တွေလို အဆင့်တစ်ခုရောက်တော့မှာပါခင်ဗျား။ ။

No comments: