ကိုယ်နဲ့ အယူဝါဒ အတွေးအမြင်မတူတိုင်း အဆိုးမြင်ဝါဒီလို့ အလွယ်တကူ ခေါင်းစဉ်တပ်လို့ မရပါဘူး။ "ယုံကြည်မှု" ဆိုတဲ့ အတွေးနဲ့ အမြင် ၂ခုအတွက် ဗုဒ္ဓက ကာလမသုတ်မှာ နမူနာယူစရာ ဟောပြခဲ့ပါသေးတယ်။ တံတားတွေဆောက်၊ လမ်းတွေဖောက်၊ ဆည်တွေတည်၊ မြို့သစ်တွေတည်၊ အိမ်ယာတွေလုပ်ပေး၊ ရေတွင်းတွေတူးပေး၊ စီးပွားရေးတွေ တိုးတက်အောင်ကြံစည်ပေး။ ဥပဒေတွေပြဌာန်းပြီး လူ့အဖွဲ့အစည်းကို ကာကွယ်ပေးဆိုတာတွေဟာ ဘယ်စနစ် ဘယ်အစိုးရဖြစ်ဖြစ် မလွဲမသွေ တာဝန်ယူလုပ်ပေးရတာချည်းပါဘဲ။ တကယ့်ကို ကောင်းအောင်လုပ်ပေးခဲ့သလား။ လုပ်ပေးသလိုလိုနဲ့ ပိုပြီး ရုပ်ပိုင်းနာမ်ပိုင်းတွေ ကြပ်တည်းလာသလားဆိုတာ အချိန်က စကားပြောလာပါတယ်။ တကယ့်ကို စေတနာပါပါနဲ့ လူ့အဖွဲ့အစည်းတစ်ခုလုံးအတွက် အဓိက လုပ်ပေးခဲ့ရင် ဒီနေ့ မြန်မာပြည်မှာ ဆင်းရဲမွဲတေမှု့တွေ၊ ဆန္ဒပြမှု့တွေ၊ တော်လှန်ရေးတွေ ဖြစ်စရာ အကြောင်းမရှိနိုင်ပါဘူး။
၆၂ခုနှစ်က စတွက်ရင် နှစ်ပေါင်း ၅၀နီးနီး စစ်အုပ်ချုပ်ရေး အဆက်ဆက်နဲ့ မြန်မာပြည်ဟာ ဖြတ်သန်းခဲ့ပါတယ်။ ဒီနှစ် ၅၀နီးပါးမှာဘေးပတ်ဝန်ကျင်က နိုင်ငံနဲ့ ယှဉ်ကြည့်ပါ။ တော်တော်လေး နောက်ကျကျန်ခဲ့တာ မျက်မြင်ကိုယ်တွေ့ပါဘဲ။ ကိုယ့်ရဲ့စနစ်ဇယား စေတနာမှားယွင်းမှု့တွေကို ဖြစ်သမျှ အကြောင်း ပြည်ပကိုလိုလက်သစ်တွေကြောင့်တို့၊ ပြည်တွင်းပုဆိန်ရိုးကြောင့်တို့လို့ အပြစ်ပုံချတာဟာလဲ သဘာဝမကျပါဘူး။ အဓိက တာဝန်ရှိတာက အာဏာလက်ရှိတွေ ပေါ်မှာသာပါ။ ကျွန်တော်တို့ မြန်မာပြည်က အစဉ်အလာအရ ဗုဒ္ဓအယူဝါဒအားကြီးပါတယ်။ ယေဘူယျကြည့်ရင် တော်ရုံဆင်းရဲမှု့လောက်ကတော့ ဗုဒ္ဓအဆုံးအမကြောင့် ခံနိုင်ရည်ရှိပါတယ်။ စိတ်လွတ်လွတ်လပ်လပ်နဲ့ လုပ်ကိုင်စားသောက်ခွင့်ရရင်ဘဲ ကျေနပ်နေကြတဲ့ "ပြည်ထောင်စု"ကြီးပါ။ အတွင်းသဘောကြည့်ရင်လည်း အတွေးအခေါ် ပညာဗဟုသုတနဲ့ ဉာဏ်ရည်ဉာဏ်သွေးလဲ အဆင့်ရှိတဲ့ "ပြည်ထောင်စုသား" တွေပါ။ အခုတော့ အုပ်ချုပ်သူအစဉ်အဆက်တွေဟာ သာမာန် စည်းစိမ်ယစ်မူးရုံတင်မက၊ မိသားစုတွေရဲ့ နေ့စဉ်ဘ၀တွေထဲအထိ ကျူးကျော်ချုပ်ကိုင်မှု့တွေ ပြုမူလာတော့ မြန်မာပြည်သားတွေဟာ ရုန်းကန်မှု့သဘောတွေ ဖြစ်လာခဲ့တာ။ အဲ့ဒါကို အဆိုးမြင်ဝါဒီတွေလို့ ခေါ်နိုင်ပါသလား။ အခုတော့ ပြည်ထောင်စုကြီးမှာ ဖြစ်နေပုံက စစ်အုပ်ချုပ်ရေးသမားတွေနဲ့ စစ်အုပ်ချုပ်ရေးသမားတွေကို မှီပြီးစီးပွားဖြစ်နေကြတဲ့ ဘာသာရေးအဖွဲ့အစည်းအပါအ၀င် နာမည်အမျိုးမျိုးနဲ့ အဖွဲ့အစည်းအသီးသီးက လူတွေက အကောင်းမြင်ဝါဒီတွေဖြစ်ပြီး၊ ရုပ်ပိုင်းနာမ်ပိုင်း အကြပ်အတည်းပေါင်းစုံနဲ့ ဖြတ်သန်းနေရတဲ့ ကျန်မြန်မာပြည်သားတွေက အဆိုးမြင်ဝါဒီတွေ ဖြစ်နေပါရောလားခင်ဗျာ။ ။
Thursday, February 28, 2008
Subscribe to:
Post Comments (Atom)
No comments:
Post a Comment